Ncopp’ â pelle ’e mmane
Addummannava sultanto ca ’o cielo,
ca llà ncoppa allargava ’e scelle eterne,
s’avvicinasse p’ ’o ‘nciprià ’e silenzio,
ca venessero abbascio ’e ccattedrale
r’ ’e nnuvole ch’ ’e spuma erano fatte,
s’acalassero quase a tuccà nterra,
fino a farlo affunnà
’nt’ ’a na vammàcia ’e latte,
e tutto fosse na tuvaglia fresca
spasa pe’ ddà â jurnata addore ’e festa.
Già se senteva ncopp’ â pelle ’e mmane
immense ca ’o pittavano ’e celeste.
SULLA PELLE LE MANI – Domandava soltanto che il cielo, / che là sopra allargava le ali eterne, / s’accostasse a incipriarlo di silenzio, / che venissero giù le cattedrali / delle nuvole che di spuma erano fatte, / s’abbassassero quasi a toccar terra, / fino a farlo affondare / in una bambagia di latte, / e tutto fosse una tovaglia fresca / stesa per dare / alla giornata un odore di festa. / Già sulla pelle sentiva le mani / immense, a colorarlo di celeste.
(da Nisciuna voce, 2011, Ed. Raffaelli, Rimini)
Atto ‘e rulore
Dio mio me pento, sì, aggio sbagliato,
nun aggio respirato ‘o viento ‘e gioia
c’attraversava ‘o munno c’hê criato.
‘Nt’a stu quadro magnifico, ca tene
‘o silenzio celeste pe’ curnice,
io nun aggio saputo esse felice.
E, chello ca po’ è peggio, nun so’ stato
manco capace ‘e rà felicità
a chi proprio ra me se l’aspettava:
‘a colpa cchiù tremenda,
‘o peccato cchiù grave.
E chesto m’addulora,
perdoname, Signore.
ATTO DI DOLORE – Dio mio, Dio mio mi pento, sì, ho sbagliato, / non ho inspirato il vento della gioia / che attraversava il mondo che hai creato. / In quel quadro magnifico / che silenzio celeste ha per cornice, / non ho saputo essere felice. // E, quello ch’è poi peggio, / non sono stato neppure capace di dar felicità / a chi proprio da me se l’aspettava: / la colpa più tremenda, / il peccato più grave. // E questo mi addolora, / perdonami, Signore.